Screenshot Photo by PxHere
Tidbits is a Forverts feature of easy news briefs in Yiddish that you can listen to or read, or both! If you read the article and don’t know a word, just click on it and the translation appears. You’ll also find the link to the article in English after each news brief. Listen to the report here:
די ירושלימער פּאָליציי האָט די וואָך אַרעסטירט נײַן ייִדן, וואָס האָבן געפּרוּווט אַרײַנגנבֿענען אַ ציג אויפֿן הר־הבית, כּדי עס מקריבֿ צו זײַן לכּבֿוד דעם יום־טובֿ פּסח שני.
דורכן ווידעאָ פֿון אַ זיכערהייט־קאַמערע קען מען זען ווי די מאַנסבילן גייען אַרײַן דורכן טויער פֿונעם הר־הבית, טראָגנדיק דאָס ציגעלע אין אַן אײַנקויף־זאַק פֿונעם סופּערמאַרק „רמי לוי“.
בעת די פּאָליציאַנטן האָבן געפּרוּווט בלאָקירן דעם אַרײַנגאַנג האָט איינער פֿון די מאַנסבילן הויך געזאָגט דעם „שמע ישׂראל“ און דער ייִד מיטן ציגעלע איז אַרײַגעלאָפֿן. דאָרטן האָט ער אָפּגעלאָזט דעם זאַק מיטן ציגעלע און זיך געוואָרפֿן אויף ד׳רערד. דערנאָך איז ער אויפֿגעשטאַנען און עטלעכע פּאָליציאַנטן האָבן אים אָנגעכאַפּט.
אַלע נײַן מענטשן האָט מען אַרעסטירט און דאָס ציגעלע האָט מען אָפּגעשיקט אויף וועטערינאַרישער באַהאַנדלונג.
אין די צײַטן פֿון תּנ״ך, האָט פּסח שני געדינט ווי „אַ צווייטע געלעגנהייט“ צו ברענגען אַ קרבן אין בית־המקדש. דאָס איז געווען לטובֿת יענע ייִדן, וואָס האָבן דאָס נישט באַוויזן צו טאָן פּסח. דאָרט וווּ עס שטייט הײַנט דער הר־בית איז אַ מאָל געשטאַנען דער בית־המיקדש.
דאָס איז נישט דאָס ערשטע מאָל וואָס עמעצער פּרוּווט ברעגען אַ ציג פֿאַר אַ קרבן אויפֿן הר־הבית. אין 2024 האָט די פּאָליציי אַרעסטירט דרײַצן מענטשן וואָס האָבן געפּרוּווט אַרײַנשמוגלען צוויי ציגן — איינע אין אַן אײַנקויף־זאַק און אַ צווייטע אין אַ קינדער־וועגעלע.
צו לייענען מער וועגן דעם אויף ענגליש, גיט אַ קוועטש דאָ.
To read more about this in English, click here.
